2Jo | BOJ | STEP |

2 JON

2 John

1 E Kristen naŋgo gate. Ni uŋa Qotei na giltmej qaji. E na anjam endi neŋgreŋyosim ino aŋgro naŋgi qa ti ni qa ti qariŋyonum. E bole merŋgwai. E niŋgi tulaŋ qalaqalaiŋgeqnum. E segi na sai. Tamo uŋgasari kalil anjam bole qalieonub qaji naŋgi dego niŋgi tulaŋ qalaqalaiŋgeqnub. 2 Anjam bole di gagoq di unu. Anjam di bati gaigai gagoq di sqas. Deqa iga niŋgi tulaŋ qalaqalaiŋgeqnum. 3 Abu Qotei wo aqa Ŋiri Yesus Kristus wo naŋgi aiyel anjam bole na ti qalaqalaiyo kumbra na ti iga qa are tulaŋ boleinjrsim dulibqa iga lawo na sqom.

Niŋgi qalaqalaiyo kumbra dauryoqniye

4 Ino aŋgro qudei naŋgi anjam bole dauryeqnub e di qusim deqa e tulaŋ areboleboleibqo. Agi Abu Qotei a nami iga aqa anjam dauryqa mergej. 5 Ariya uŋa, e ni anjam bei mermitqa ni qusim daurye. Anjam agiende. Iga segi segi na gago Kristen was naŋgi qalaqalainjroqnqom. E dal anjam bunuj ni mermosai. Dal anjam di iga nami qusim ojem. 6 Qalaqalaiyo kumbra agiende. Iga Qotei aqa dal anjam dauryoqnqom. Dal anjam di aqa damu agiende. Niŋgi qalaqalaiyo kumbra dauryoqniye. Dal anjam di agi niŋgi nami queb.

Niŋgi Kristus aqa anjam siŋgila na ojesoqniye

7 Niŋgi quiye. Tamo gargekoba naŋgi iga gisaŋgwa maroqnsib mandam endia laqnub. Yesus Kristus a tamo bulyosiq mandamq aiej anjam di naŋgi olo saideqnub. Tamo deqaji naŋgi gisaŋ tamo. Naŋgi Kristus jeuteqnub. 8 Deqa niŋgi geregere ŋam atoqniye. Gago wau iga nami nuŋgo ambleq di yoqnem qaji di niŋgi olo urato uge. Niŋgi siŋgila na tigeloqniye. Osib di niŋgi awai bole oqab. 9 Tamo bei a Kristus aqa anjam ojqa uratosim olo anjam bei totoryosim dauryqas di a Qotei ombla sqa keresai. Ariya tamo bei a Kristus aqa anjam siŋgila na ojesqas di Abu Qotei wo aqa Ŋiri wo naŋgi a koba na sqab. 10 Tamo bei a niŋgi qa bosim ariya a Kristus aqa anjam ti bqasai di niŋgi a baŋ ojaib. Niŋgi a osib nuŋgo talq osi gilaib. 11 Niŋgi a baŋ ojqab di niŋgi a aqaryaiyosib a ombla wau uge ojqab.

Jon a naŋgi qa bosim anjam kalil minjrekritqas

12 E anjam gargekoba neŋgreŋyosiy niŋgi qa qariŋyqa kere. Ariya e neŋgreŋyqasai. E mati bosiy niŋgi nuŋgsiy anjam kalil di merŋgekritqai. Yim niŋgi qusib areboleboleiŋgwas.

13 Ino jaja agi Qotei na giltej qaji aqa aŋgro naŋgi na ni kaiyeimonub.